Rubrik Jagad Jawa ugi kababar ing Koran Solopos saben Kemis. Ing babaran Kemis (10/1/2019) menika kapacak geguritan anggitanipun St. Sri Emyani, Guru SMP Negeri 1 Panggul Trenggalek.
Aruming lathi ngrengga impen sepi
rinumpaka minangka kidung mentiyung
beluk kembang kecubung kelayung-layung
gelaring suwarga maya gumawang netra
jejogedan madyaning pasrawungan
Teleng sukma suwung temlawung
pasren asmarandana kawuri ngegla
rasa kaundha pethit langit
mabur nggegana raya
ora lungse lajuning tengange
Ooo Rayi
eman pedhot
kesambet bolah manca
Prasasti
Sedya katekem njero dhadha mbrubul ngangkasa
krenteg kalempit telenging rasa mrucut pethit langit
netra ngulati angkasa tawang suwung
leksan kedhep lintang ngepung rembulan kalangan
angen kebandhulan pitakon
durung ketemu paugeran maton
urip hamung playon
Laku mung nemu sisa impen esuk
setya ngrengggani nala papa
ndhangak nyawang angkasa
ndhingkluk mandeng bumi
ngrumpaka ukara nedha nrima
gelar donya kuwawa ngurung budaya
– kelepyan !
– lena !
Lha dalah
iki hlo putu
sarining kalbu tinatah ana geger watu
kangge ngantebne kalbu
ngapa ora maelu?
Nyawiji
Nyilemi tlaga jiwa
mantebing kalbu ragu
ilining banyu butheg ngampleg-ampleg
tirta wening garing mekingking
kapanggang mangsa
Para kawula padha ngelak kuwasa
abdi dhapuk leladi adreng rebut kembang rawe
sinambi ngombe eluhe dhewe
Laju baita kesempyok ombak
semplah kaobat abit kahanan
jumedher pecut kuwanen
nggegiro kejeme panguripan
Ngger ayo bali
nyawiji ngesti lajer kabudayan
kangge nglawan worsuh kamurkan
jaman angel dilawan
Purnaning Lelakon
Ungaken sukma bawera
aja ragu yen pancen durung ketemu
reroncen angen tanpa wangen
kaya Bima nglacak dununge tirta perwita sari
urip winates pesthi
Sawangen ombak aluning samodra
setya nyaponi lathi pesisir
tekan wates pinggir
nggeret bathang temangsang
kadhang nyeret kembang kumambang
tanpa wang
Oncekana kanthi landheping nurani
pecak dawaning lakon
apa mentog purnaning lelakon
kok wus bali
Gusti