Geguritan: Ing Wangi Tempe

<p><strong><em>Rubrik Jagad Jawa ugi kababar ing Koran Solopos saben dinten Kemis. Ing babaran Kemis (13/9/2018) menika kapacak geguritan anggitanipun&nbsp;Yan Tohari, sastrawan kang duwe asma asli Sriyana, mapan ing Dukuh RT 003/RW 009 Ringinputih, Karangdowo, Klaten.</em></strong></p><p><strong></strong></p><p><strong>Ing Wangi Tempe&nbsp;</strong></p><p>ing luwes tanganmu dadi prasaja wangine tempe</p><p>ngelingake wanci kapang kang <a href="http://www.solopos.com/jagadjawa/read/20180906/524/938175/reyog-ponorogo-mratah-ing-njaban-rangkah" title="Reyog Ponorogo, Mratah Ing Njaban Rangkah">arang kaglape</a></p><p>dina mbaka dina selot werit dadi cangkriman</p><p>prasasat kepyuring laru, endi prasetyamu tetep dakluru</p><p>&nbsp;</p><p>yayi, ing pojok kampung apa sliramu durung rampung</p><p>nyingidake rasa ing suwalike pacak-barising kluwung</p><p>apa datan nglenggana kabeh dadi underan rasa gempung</p><p>samangsane joko-joko <a href="http://www.solopos.com/jagadjawa/read/20180830/524/936804/seni-budaya-bathik-saya-ngrembaka" title="Seni Budaya Bathik Saya Ngrembaka">desa padha</a> kajiret cekaking sarung</p><p>&nbsp;</p><p>manisku, nuli endi semur tempe sing mbokcepakake</p><p>sawuse kadang-kadangmu ngetus riwe ing tegalan kene</p><p>nancepake carang pepenginan sing asring kabuncang sepi</p><p>o, tetela lemah desa tan maneh mencutake drajating ati</p><p><em>Karangdowo, Klaten, 2018</em></p><p>&nbsp;</p><p><strong>Kasisa Sabuntel Tempe</strong></p><p>ngger, isih kasisa sabuntel tempe ing kene</p><p>muga kena kanggo sangu nyurasa werdining impen</p><p>nadyan wengi-wengi salawase iki wis datan kopen</p><p>awit gumresahing ati sarta undhaking dahwen</p><p>&nbsp;</p><p>ewasemana aja gelem kalah <a href="http://www.solopos.com/jagadjawa/read/20180809/524/933117/solo-punjering-gamelan-kang-adiluhung" title="Solo Punjering Gamelan kang Adiluhung">klawan tekade</a> gangsir</p><p>sing setya anggladhi budi nadyan weteng kalingsir</p><p>tampanen wae, pancen mangkono pesthine jaman</p><p>jumangkaha kaya jejege sunar lintang lan rembulan</p><p>&nbsp;</p><p>ngger, age gelaken dawane urung-urung</p><p>aja sumelang yen sikil kudu kesandhung</p><p>imbane tempe kang saiki akeh kabuntel dluwang</p><p>ora ana salahe yen urip kala-kala mlayu anglancang</p><p><em>Karangdowo, Klaten, 2018</em></p><p>&nbsp;</p><p><strong>Rapaling Tukang Tempe</strong></p><p>niyat ingsun ambuntel tempe</p><p>nadyan dhele terus muluk regane</p><p>awit gawe tempe dudu amburu bathi</p><p>nanging kabeh mangestu pakeming Gusti</p><p>tempe jembaring sedyaku,</p><p>tempe megar mingkuping napasku</p><p>tempe drajating panembahku</p><p>&nbsp;</p><p>niyat ingsun agawe tempe</p><p>binuntel panrima, tinali kuwating prasetya</p><p>ing tempe sinebaran cahya, kinepung arum pulung</p><p>rosa sing anggawe, sentosa kang mbakulake</p><p>tempe tan wangenan iklas, gawe sing mangan waras</p><p>&nbsp;</p><p>niyat ingsun agawe tempe</p><p>ngukuhake guyubing lair, manunggaling batin</p><p>sarwa ilang lamising ati</p><p>esuk dhele sore tempe, dudu esuk tempe sore dhele</p><p>manungsa kang meminta, Gusti kang sembada</p><p>saciptaku dadi, dadia tempe sing mberkahi</p><p>dadi, dadi, dadi…. saka kersaning Gusti</p><p><em>Karangdowo, Klaten, 2018</em></p><p>&nbsp;</p><p><strong>Tresna ing Sacuwil Tempe</strong></p><p>dakukur tresnaku ing sarupane tempe lan tahu</p><p>nuli dakwadhahi takir katambah puji dikir</p><p>mbokmanawa kowe tetep nyangking jenengku, bapakmu</p><p>mbeneri slametanmu ing sewu dina ninggalake aku</p><p>tetela prasaja, tresna kita linambaran manising palawija</p><p>sumurupa, anak-anakmu wis dadi wong mblegedhu</p><p>embuh apa dheweke isih gelem mangan tempe lan tahu</p><p>&nbsp;</p><p>ing pancenan iki, dakobong kumeluning menyan</p><p>gawang-gawang kita nate ngliwati mangsa larang pangan</p><p>ing sacuwil tempe, nalika semono sliramu nggeget lambeku</p><p>klawan atimu sing sabar ngluwihi jembaring segara</p><p>bebarengan negesake rumpil cerung lara-lapa</p><p>&nbsp;</p><p>bapakmu, iki wangine tempe tetep dadia wujuding prasapa</p><p>lamun tresna tan cukup kasabda saracik kembang setaman</p><p>mengku luhuring janji wiwit donya tekan delahan</p><p>saka tempe waras apadene tempe bosok</p><p>yen tresnaku datan nate dadi rosok</p><p><em>Karangdowo, Klaten, 2018</em></p><p>&nbsp;</p><p><strong>Wiramane Sambel Tempe Bosok</strong></p><p>simbok, endi maneh sambel tempe bosok</p><p>ujubing laladan urip amrih bisa cumandhok</p><p>welingmu, &rdquo;ngger ngudaneni urip aja gampang kapok&rdquo;</p><p>nugraha iku pepenginan, sesanggan mono jejibahan</p><p>&nbsp;</p><p>simbok, dakbaleni maneh ing tembang kekudanganmu</p><p>anak lanang pinter perang, anak wedok pinter jangan lombok</p><p>nanggapi pesthi merlokake larikane budi</p><p>persis sumanggeme raden permadi apa kuwanene srikandhi</p><p><em>Karangdowo, Klaten, 2018</em></p><p></p>

Promosi Mi Instan Witan Sulaeman