SOLOPOS.COM - Panduan Informasi dan Inspirasi

<p><strong><em>Rubrik Jagad Jawa ugi kababar ing Koran Solopos saben dinten Kemis. Ing babaran Kemis (4/10/2018) menika kapacak geguritan anggitanipun&nbsp;Yan Tohari, sastrawan kang duwe asma asli Sriyana, mapan ing Dukuh RT 003/RW 009 Ringinputih, Karangdowo, Klaten.</em></strong></p><p><strong>Prau Sing Kudu Kasantang</strong></p><p>daktatah pindhaning tresna<br />gladhak prau sing bakal nyangking kita<br />mapag ketebang-ketebang rembulan purnama<br />nadyan aku ngerti kuwi kabeh <a href="http://www.solopos.com/jagadjawa/read/20180906/524/938178/sujarah-reyog-lan-piwulang-becik" title="Sujarah Reyog lan Piwulang Becik">amung lamising impen</a><br />sing kecer mbebeda lelembaking pepenginan</p><p>dakrapal maneh wewenganing wengi ijen tanpa kanthi<br />sinambi nggambar praupanmu sing padhang jingglang<br />kasuntakan maewu-ewu cahyaning lintang<br />mbaka salembar kekuwatan tresna dakanam<br />murih bali sesanggeman ati kang awarna putih mlathi<br />endi, kabeh prasetyamu sing mboktulis ing layar biyen<br />mratandhani saiba janjiku lan janjimu lir ombak iku</p><p>nimas, isih adoh welah iki kudu sengkut mbebudi<br />nrajang uleganing godha sarta kumelaping pradondi<br />jalaran aku ngerti yen telaga iki winates sarana<br />kang negesake sepira pait lan asining urip kita<br />prau kudu tetep kasantang, ngudhari manising kapang</p><p><em>Karangdowo, Klaten, 2018</em></p><p><strong></strong></p><p><strong>Prau Manising Kalbu</strong></p><p>mumpung isih repet-repet, anakku<br />enggal santangen prau manising kalbu<br />kanggo negesake saben kecopak banyu uripmu<br />dina-dina bakal dadi cangkriman werdine lelayaran<br />tetesing kringet ora ana sing tiba tanpa pitungkasan</p><p>mumpung isih jembar tlatah iki kudhung wektu, anakku<br />sarta legining bun ngendahake sumilake gagat rina<br />mara gelaken ngimbangi aburing manuk-manuk mriwis <br />kang mbeburu lenaning kotes lan wader-wader pari<br />kanggo ngloloh anak-anake sing isih turu kepati</p><p>ngger, ora ana paedahe nggersula lan sambat ngaru-ara<br />urip pancen akeh sing nukulake rasa cubriya<br />ewasemana enggal santangen greget tumuju eloking jejangka<br />ana kana wis padha nyranti eseme widadara widadari<br />kang nujuprana setya ngancani turumu melahi <a href="http://www.solopos.com/jagadjawa/read/20180927/524/942292/daeng-soetigna-lan-sumebare-angklung-ing-nuswantara" title="Daeng Soetigna lan Sumebare Angklung ing Nuswantara">endahing wengi</a></p><p><em>Karangdowo, Klaten, 2018</em></p><p><strong></strong></p><p><strong>Ing Satengker Welah</strong></p><p>ing satengker welah, ati iki kudu kepradhah<br />milang lintang, ngetung gumebyaring padhang<br />nadyan gaduk tuna nggayuk dhasaring kedhung<br />&ldquo;ora mung pasrah, urip perlu reka-daya,&rdquo; ngono welinge biyung</p><p>ing welah, cinipta polah kudu wani ngalah<br />ngrungu ilining ati, bebarengan negesi jero cetheking kali<br />kanggo apa ngopeni umriking serik sarta landheping ewa<br />jalaran kabagyan yaiku wis rampung anyambrang <br />ngliwati jembar sakathahing pepenginan</p><p><em>Karangdowo, Klaten, 2018</em></p><p><strong></strong></p><p><strong>Sangarepe Canthik Rajamala</strong></p><p>sangarepe canthik rajamala, sliramu temah nglenggana<br />lamun sih tresna wis dudu jembar apa ciute Bengawan Sala<br />utawa rame lan nyenyete ruwang-ruwang Radyapustaka<br />nanging eseme prawan sunthi sing sansaya nyalawadi<br />sangu manis nlasaki sadawaning dalan slamet riyadi</p><p>pisan maneh rungokna landhepe untu-untu renget <br />kliwat rosa ngejur-ejur lembaran kaca-kaca kalathidha<br />taman sriwedari wis kelangan wingite kopel pujangga<br />saiba tresna malik angin nibakake godhong-godhong ringin<br />mangkono jaman negakake <a href="http://www.solopos.com/jagadjawa/read/20180823/524/935663/sinau-tata-cara-nggawe-keris" title="Sinau Tata Cara Nggawe Keris">manis kebon raja</a> amung kari crita</p><p><em>Karangdowo, Klaten, 2018</em></p><p></p><p><strong>Tegesing Prau</strong></p><p>negesake prau, tetela iku dununging lair lan batinmu<br />wondene ombaking segara araning jagad gumelar<br />angin minangka kekuwatan pikir, welah kridhaning ati<br />temah layar papaning kawruh paran ngendi urip rinengkuh</p><p>prau nyambungake jangkahmu ing kiblating Gusti<br />prau ngemban sedyamu nyambrang memanising ngagesang<br />prau pambukaning wiwara kanggo apa sira temah cinipta<br />lan prau dadi pangetusing budi nuduhake dalan tumuju bali</p><p>ewasemana tumapak saripathing panggrahita<br />araning prau bakal lumebur ing uleganing cahya<br />nadyan tanpa prau sembada tandhes ing banyu kasampurnan<br />kadidene raden bratasena sing tanpa prau <br />lulus nyambrangi samodra minang kalbu</p><p><em>Karangdowo, Klaten, 2018</em></p><p></p><p><strong>Prau Kapang</strong></p><p>isih daksranti sliramu teka ana kene<br />mumpung kali jurug durung asat banyune<br />pepraon kaya puluhan taun kepungkur<br />nuli methik rembulan kang ketangsang<br />ing pang munggur&hellip;</p><p><em>Karangdowo, Klaten, 2018</em></p>

Promosi Mitsubishi XForce: Stylish untuk Wanita, Praktis buat Ibu Muda

Cek Berita dan Artikel yang lain di Google News
Simak berbagai berita pilihan dan terkini dari Solopos.com di Saluran WhatsApp dengan klik Soloposcom dan Grup Telegram "Solopos.com Berita Terkini" Klik link ini.
Solopos Stories
Honda Motor Jateng
Honda Motor Jateng
Rekomendasi
Berita Lainnya