Geguritan

<p><strong>Solopos.com, SOLO –</strong> Rubrik Jagad Jawa ugi kababar ing Koran Solopos saben dinten Kemis. Ing babaran Kemis (2/7/2018) menika kapacak geguritan anggitanipun Yan Tohari, sastrawan ingkang pidalem ing Karangdowo, Klaten.</p><p><strong>NGLARUNG SEPA</strong><br />lan kayadene angin, aku terus kabuncang<br />mlebu lan metu ing wewengkon ampang<br />lair lan batinku koncatan edining teges<br />banjur ana ngendi aku nemu atimu, yayi<br />saparan laku aku malik abot lebu…</p><p>ing esuk iki,<br />nalika cendhela dakwengakake mawa sagarit was-was<br />tetela wektu sakalir wektu malik dadi urubing geni<br />kanthi apa aku kuwawa nylametake sagegem sesanti<br />tan wurung sakehing jiwa kabeh kabesmi</p><p>yayi, marang ketes bun nyoba kita nglarung sepa<br />mbokmanawa isih kasisan manising wengi <br />ing kene, ing latar iki, pisan maneh dakronce ukara<br />nadyan gurit saiki amung kari getiring panarima</p><p>Klaten, Karangdowo, 2017</p><p><strong>TUMUJU KARAMPUNGAN</strong><br />embuh kapan bisa karampungan<br />aku ngudhari irat-irataning kapang<br />nulis mbaka salarik aksara tresna<br />nuli nglenggana yen urip iku ngukuti kabagyan</p><p>ing kene durung ana cahya kang tetegaran<br />kabeh wujud brahala<br />nimas, kanthinen tangan iki <br />ngelusi kecering sengsem ing tapak sepi<br />temah wengi ora mung larahan impen</p><p>embuh kapan, <br />tangis owah dadi gumebyaring manis<br />padhas malik ilining banyu-banyu kawelasan<br />uga sepi sing karuwat nuju elok pahargyan<br />ing kene aku nunggu tekaning atimu</p><p>Karangdowo, Klaten, Maret 2018</p><p><strong>MRING KAMULYANING ANGIN</strong><br />saka sungsum angin sliramu dilairake<br />dene bapa biyungmu uga turasing samirana<br />yen urip kawiwitan kulaking napas ing teleng hawa<br />melar mingkusing ati minangka unining wewadi<br />pati utawa urip amung dadi pamilahing pepesthi</p><p>rilakna, angin bisa ngrebda ing sanubarimu<br />ngudhari bundhetaning panalar awit pepaekaning jaman<br />jaring sakaliring werna kukus mega minangka sesotya<br />awit angin kang kuwawa ngruwat sukertamu<br />temah sengit dadi tresna <br />… lan satru dadi mitra</p><p>Karangdowo, Klaten, 2016</p><p><strong>ARAHING JANGKAH</strong><br />tinemu ukara kang koncatan memanis<br />nalikane surup mbebeda mawa aburing lawa<br />isih daksimpen gambarmu nimas<br />dadi rerenggan kamar kita semana<br />samangsane bedhidhing nulis ukara tresna</p><p>ing pereng-pereng kuncuping mawar<br />daktulis jenengmu mawa wangining angin<br />murih setyaku tetep ngrebda ing akasa<br />sumebar ngrenggani sela-selaning asmara</p><p>nanging, aku wis kelangan arahing jangkah<br />angel nalusur maneh tapaking rasa<br />lair batinku katriwadhan marang kumlebating <br />pambeg lan pirang-pirang adrenging karep<br />kang pijer ngenggokake jejeging patrap<br />temah keblasuk ing pepaekaning ulat</p><p>Karangdowo, Klaten, 2018</p><p><strong>KALIMPUT ING BIYADA</strong><br />nggembol rasa kadhung <br />sapinggiring kali jurug<br />kasisan gela kang isih matumpuk<br />banjur apa sing mbokrebutake dina iki<br />yen kedhunging kali pijer nyipta ribeting ati</p><p>apa mboksengguh <br />panguwasa dadi sakabahe underan kamulyan<br />kalungguhan nyipta wingka dadi mustika<br />apa atimu sing kaerut dening geni ewa<br />sumurupa, kita kabeh lagi kabanda ing lirwa</p><p>nggembol rasa bingung, ing pinggir kali jurug<br />sawangen tanggul iki wis kari sapunthuk<br />apa sliramu tega nyawang anak putu padha pitakon<br />geneya awakku lan awakmu kalimput ing biyada<br />kamangka werna-werna sanggan isih ngalela?</p><p>Karangdowo, Klaten, 2018</p><p><strong>LELAMISING SUJARAH</strong><br />ya ing dalan iki, nalika tanganmu dakkanthi<br />nlasak surup kang rinengga aburing sriti<br />geneya lair batin durung kuwawa nglenggana<br />kamangka jaman wis kerep salin rupa<br />dene taun mbaka taun amung kaisi rebut dhucung</p><p>mitra, endi manis sing mboktitipake mekaring mawar<br />sapinggiring blumbang taman balekambang iki<br />sliramu nate crita bab ontran-ontran kutha bengawan<br />yen satemene ora ana panguwasa kang sampurna<br />ken arok wae kabrongot dening weweging dhadha</p><p>ya ing dalan iki, nalika sliramu njiwit lengenku<br />wengi panggah nyisakake geguyonan kang saru<br />mara gage pisan maneh kancanana lakuku<br />nlusur lelamising sujarah, sapa ngerti kabeh bisa nyata<br />yen satriya piningit iku dudu kabar ngayawara…</p><p>Karangdowo, Klaten, 2018</p><p><strong>DONGENG ATI</strong><br />wengi tetep arupa manis esemmu<br />kang kagambar ing ros-rosaning impen iki<br />ewasemana sapirang-pirang larik gurit<br />tan kuwawa mbledig ambaning gendera tresna<br />sliramu ana ngendi saiki<br />atiku kijenan kabanda rosaning kapang…</p><p>dhik, apa kowe isih mireng?<br />yen wengi iki ati ketungkul nulis ewon asmara<br />ngracik dongeng-dongeng ati sing kagarit sepi<br />dene lintang-lintang mandheg dadi seksi<br />saiba tresna iki tetep ngluru gegantilaning ati<br />kang wis mataun-taun kasimpen tumpukan jaman<br />lan embuh saiki ana ngendi dununge sampeyan</p><p>Klaten, Maret 2018</p><p><strong>LILIN PANGELING</strong><br />satemene durung wancine aku ngurubake<br />jalaran lintang-lintang kober andum cahya<br />lan peteng tetep dadi wirama kang mencutake<br />kepara ing ngene klawan kinancan angin<br />ati sembada nggambar kasulistyanmu</p><p>dhik, yen angin sepi wis kaduga mertamu<br />tengah wengi iki dakcoba ngurubake lilin pangeling<br />madhangi wewayanganmu kang ngemba melathi<br />ngrenggani ing melar mingkusing impenku<br />geneya sliramu kedadak nyawatake pitakon, dhik<br />&ldquo;apa isih ana tresna ing ati panjenengan?&rdquo;</p><p>Klaten, Maret 2018</p><p><strong>MARANG TRESNA</strong><br />aku ngerti iki dudu tresna suci<br />nanging ilining kali ganda amis jejemberi<br />ewasemana sapa kang bisa nduwa <br />nalika dewi sukesi pasrah <br />ing pakone resi wisrawa?</p><p>Klaten, Maret 2018</p>

Promosi Jalur Mudik Pantura Jawa Makin Adem Berkat Trembesi