<p><strong><em>Rubrik Jagad Jawa ugi kababar ing Koran Solopos saben dinten Kemis. Ing babaran Kemis (13/9/2018) menika kapacak bab Carane Gawe Tempe.</em></strong></p><p><strong>Solopos.com, SOLO</strong> — Denys Lombart (2005) ing bukune kanthi irah-irahan <em>Nusa Jawa Silang Budaya: Jaringan Asia </em>ngandharake dene tempe kajupuk saka tembung tape sing maknane <em>fermentasi.</em></p><p><em> </em>Tempe pancen wujud <em>fermentasi </em>dhele nganggo kapang. Jinise kapang macem-macem, ana <em>Rhizopus oligosporus, Rhizopus oryzae, Rhizopus stolonifer,</em> utawa <em>Rhizopus arrizhus</em>.</p><p>Tempe biyasane digawe saka dhele ireng minangka ubarampe baku. Denys ngandharake budidaya dhele diwiwiti ing jaman Kraton Mataram, Jawa Tengah, ing abad kaping 16. Sabanjure iku ngrembaka <a href="http://www.solopos.com/jagadjawa/read/20180830/524/936820/batik-warisan-leluhur-tembang-sinom" title="Batik Warisan Leluhur (Tembang Sinom)">nganti tekan</a> ngendi-ngendi.</p><p>Gawe tempe butuh wektu sing suwe. Juragan tempe saka Mojosongo, Solo, Robertus Ary Gunanto, nalika ditekani ing daleme, Minggu (9/9/2018), ngandharake butuh wektu nganti telung ndina kanggo gawe tempe.</p><p>Cara gawene diwiwiti saka dhele ireng utawa putih dikum banyu, digodhok nganti setengah mateng, isine dipecah dadi loro, dikum meneh ing banyu, dionceki, ditus, ditata, lan diwur-wuri kapang, banjur diwadhahi.</p><p>Robertus ngandharake ing jaman mbiyen lumrahe ngadhahi tempe ngango wungkus godhong gedhang utawa godhong jati. Saiki wis akeh sing diwungkus kertas utawa plastik. Ing<a href="http://www.solopos.com/jagadjawa/read/20180823/524/935661/keris-karya-budaya-seni-kang-wigati" title="Keris, Karya Budaya & Seni kang Wigati"> sawetara wektu</a> kepungkur Robertus nggawe <em>inovasi </em>mungkus tempe kanthi kertas lan gambar supayane memper yen didol ing supermarket utawa pasar modheren liyane.</p><p>“Mbiyen wungkuse ya mung godhong utawa plastik. Banjur aku gawe inovasi supayane gawe wungkus saka kertas sing diwernani. Jebule malah saya okeh sing seneng tuku amarga wujude apik,” kandhane.</p><p>Minangka panganan padinan, akeh wong kang karem marang tempe. Robertus ngandharake saben dinane gawe tempe nganti 2.000 wungkus sing didol Rp500 sak wungkuse.</p><p>Rego sing murah lan rasane sing enak dadi salah sawijining alesan wong-wong milih tempe minangka lawuh kang wajib ana. Apa meneh yen rega lawuh liyane kayata endhog lan daging larang.</p><p>Jaman biyen, kandhane Robertus, <a href="http://www.solopos.com/jagadjawa/read/20180802/524/931398/geguritan" title="Geguritan">butuh nganti</a> puluhan wong kanggo gawe 2.000 wungkus tempe. Saiki buruhe luwih sithik amarga ana mesin-mesin saka pabrik sing bisa nyepetake gawe tempe.</p><p>“Biyen butuh pegawe akeh. Saiki wis nganggo mesin, kayata mesin kanggo mecahke dhele lan ngonceki dhele,” kandhane.</p><p>Ora mung wungkuse, olahan tempe uga samsaya werna-werna. Jaman biyen tempe mung digawe kanggo bacem, oseng-oseng, lan sakpiturute. Saiki ana olahan tempe kanggo <em>steak</em>, isen-isen burger, sate, uga ombenan sing didol kanthi rego larang ing restoran. Tempe sing ngandhut protein uga dadi panganan kanggone wong sing ora mangan iwak lan daging utawa kang diarani <em>vegetarian. </em></p><p> </p>
Promosi Jalur Mudik Pantura Jawa Makin Adem Berkat Trembesi